പ്രാർത്ഥനകളും റിസോഴ്സുകളും

സർവ്വശക്തിയുള്ള പിതാവായി, ആകാശത്തിന്റെയും ഭൂമിയുടെയും, കാണപ്പെടുന്നവയും കാണപ്പെടാത്തവയുമായ സകലത്തിന്റെയും സ്രഷ്ടാവായ സത്യമുള്ള ഏക ദൈവത്തിൽ ഞങ്ങൾ വിശ്വസിക്കുന്നു.

ദൈവത്തിന്റെ ഏകപുത്രനും, എല്ലാ ലോകങ്ങൾക്കും മുൻപായി പിതാവിൽ നിന്ന് ജനിച്ചവനും, പ്രകാശത്തിൽ നിന്നുള്ള പ്രകാശവും, സത്യദൈവത്തിൽ നിന്നുള്ള സത്യദൈവവും, ജനിച്ചവനും സൃഷ്ടിയല്ലാത്തവനും, തത്വത്തിൽ പിതാവിനോട് ഒന്നായിരിക്കുന്നവനും, സകലവും തന്നാൽ നിർമ്മിതമായവനുമായ യേശുക്രിസ്തുവായ ഏക കർത്താവിലും ഞങ്ങൾ വിശ്വസിക്കുന്നു.

മനുഷ്യരായ നമുക്കും നമ്മുടെ രക്ഷയ്ക്കും വേണ്ടി സ്വർഗ്ഗത്തിൽ നിന്ന് ഇറങ്ങി, † വിശുദ്ധ റൂഹായാൽ ദൈവമാതാവായ കന്യക മറിയാമിൽ നിന്ന് ശരീരിയായിത്തീർന്ന് മനുഷ്യനായി പിറന്ന്,

പൊന്തിയോസ് പീലാത്തോസിന്റെ ദിവസങ്ങളിൽ നമുക്ക് വേണ്ടി ക്രൂശിക്കപ്പെട്ട്, കഷ്ടത അനുഭവിച്ച് മരിച്ച് അടക്കപ്പെട്ട്,

മൂന്നാം ദിവസം ഉയിർത്തെഴുന്നേറ്റ്, സ്വർഗ്ഗത്തിലേക്ക് കരേറി തൻ്റെ പിതാവിന്റെ വലത്തുഭാഗത്ത് ഇരുന്നവനും, ജീവനുള്ളവരെയും മരിച്ചവരെയും വിധിപ്പാൻ തന്റെ വലിയ പ്രഭാവത്തോടെ വീണ്ടും വരുവാനിരിക്കുന്നവനും, തന്റെ രാജ്യത്തിന് അവസാനമില്ലാത്തവനുമായ ഏക കർത്താവിലും ഞങ്ങൾ വിശ്വസിക്കുന്നു.

പിതാവിൽ നിന്ന് പുറപ്പെട്ട്, പിതാവിനോടും പുത്രനോടും ഒപ്പം ആരാധിക്കപ്പെട്ട് സ്തുതിക്കപ്പെടുന്നവനും, പ്രവാചകന്മാരും അപ്പോസ്തലന്മാരും മുഖേന സംസാരിച്ചവനുമായ, ജീവനും നൽകുന്ന ഏക പരിശുദ്ധ റൂഹായിലും ഞങ്ങൾ വിശ്വസിക്കുന്നു.

കൂടാതെ കാതോലികവും അപ്പോസ്തലികവുമായ ഏക വിശുദ്ധ സഭയിലും ഞങ്ങൾ വിശ്വസിക്കുന്നു. പാപമോചനത്തിനുള്ള ഏക മാമ്മോദീസ ഞങ്ങൾ ഏറ്റുപറഞ്ഞ്, മരിച്ചവരുടെ ഉയിർത്തെഴുന്നേല്പിനും വരുവാനിരിക്കുന്ന ലോകത്തിലെ പുതിയ ജീവനുമായി ഞങ്ങൾ നോക്കിപ്പാർക്കുന്നു. ആമേൻ.